Полска уште еднаш покажа дека државната безбедност не е предмет на компромис. Домашната тајна служба (ABW) уапси осум лица осомничени за подготовка на саботажи и диверзии на територијата на земјата, вклучувајќи активности насочени кон разузнавање и можни напади врз воени објекти и стратешка инфраструктура. Според премиерот Доналд Туск, операцијата е дел од поширока кампања за неутрализирање на хибридните закани кои, како што тврдат властите, доаѓаат од надворешни актери поврзани со Русија.
Полските власти ја оценуваат акцијата како клучен чекор во спречувањето потенцијално сериозни безбедносни инциденти, кои би можеле да ја дестабилизираат земјата во момент кога таа игра водечка улога во поддршката на Украина. „Ова е дел од хибридна војна која ја водат сили што сакаат да ја ослабнат нашата држава и да ја нарушат нашата стабилност,“ изјави Туск, додавајќи дека ќе продолжи засилената контраразузнавачка активност и во следните месеци.
Овој случај уште еднаш покажува зошто Полска важи за една од најподготвените земји во источниот дел на Европската унија кога станува збор за хибридни напади и закани. Од кибер-напади до саботажи и шпионски активности, Варшава гради систем кој комбинира агресивна безбедносна стратегија со блиска соработка со НАТО и европските партнери. Пораката што ја испраќа е јасна: Полјаците не се шегуваат со безбедноста – и секоја закана ќе биде пресретната уште пред да се реализира.
