Авиокомпаниите денес продолжија да избегнуваат големи делови од Блискиот Исток по американските напади врз ирански нуклеарни постројки, според страницата за следење летови FlightRadar24. Сообраќајот веќе го заобиколуваше воздушниот простор во регионот поради неодамнешните меѓусебни ракетни напади меѓу Израел и Иран.
„По американските напади на ирански нуклеарни објекти, комерцијалниот сообраќај во регионот функционира според новите ограничувања на воздушниот простор воведени минатата недела,“ објави FlightRadar24 на платформата X.
Според нивната интернет-страница, авиокомпаниите не летаат над воздушниот простор на Иран, Ирак, Сирија и Израел. Наместо тоа, избираат други рути – преку северот над Каспиското Море или преку југот, односно Египет и Саудиска Арабија – дури и ако тоа значи повисоки трошоци за гориво, екипаж и подолги летови.
„Советуваме висок степен на претпазливост“
Сѐ почестите напади со ракети и дронови во голем број конфликти ширум светот претставуваат сериозен ризик за воздушниот сообраќај. Според Safe Airspace, веб-страница на организацијата OPSGROUP која споделува информации за ризици при летање, американските напади на Иран може да ги зголемат ризиците за американските оператори во регионот.
„Иако нема конкретни закани за цивилното воздухопловство, Иран претходно предупреди дека ќе возврати со напад врз американски воени интереси на Блискиот Исток – директно или преку посредници како Хезболах,“ наведува Safe Airspace.
Откако Израел започна напади врз Иран на 13 јуни, повеќето авиокомпании ги суспендираа летовите кон дестинации во погодените земји. Иако имало некои евакуациски летови од соседни земји, дел од Израелците се вратија дома.
Во деновите пред американските напади, American Airlines ги суспендираше летовите кон Катар, а United Airlines ги прекина летовите кон Дубаи.
Safe Airspace предупредува дека ризиците во воздушниот простор може да се прошират и кон земји како Бахреин, Кувајт, Оман, Катар, Саудиска Арабија и Обединетите Арапски Емирати.
„И понатаму советуваме висок степен на претпазливост во моментот,“ се вели во извештајот.
Туристите сакаат да го напуштат Израел
Најголемите израелски авиопревозници – El Al Israel Airlines, Arkia и Israir – денес соопштија дека до понатамошно известување ги суспендираат летовите што овозможуваа враќање на луѓето во Израел.
El Al исто така објави дека ги продолжува откажувањата на планираните летови до 27 јуни.
Израелската управа за аеродроми изјави дека воздушниот простор на земјата е затворен за сите летови, но дека копнените премини со Египет и Јордан остануваат отворени.
Десетици илјади Израелци и странци кои имаат резервации за Израел не можат да стигнат во земјата. Во исто време, речиси 40.000 туристи во Израел сакаат да ја напуштат земјата – некои од нив преку границата со Јордан до Аман, а други со брод кон Кипар.
Министерството за туризам соопшти дека работи на олеснување на нивното заминување.
