Севернокорејскиот лидер Ким Џонг Ун повторно е избран за генерален секретар на владејачката Работничка партија на Кореја, јавија државните медиуми. Делегатите на партискиот конгрес го поздравија како клучна фигура за зајакнување на нуклеарниот арсенал и зацврстување на регионалната позиција на земјата.
Партискиот конгрес, кој традиционално има силна пропагандна димензија, навестува дека во наредниот петгодишен период ќе продолжи засиленото инвестирање во воените капацитети. Според извештаите, фокусот останува на развој на ракети способни да погодат цели во регионот и пошироко, како и на дополнително интегрирање на конвенционалните и нуклеарните сили.
Објавен е и нов состав на моќниот Централен комитет, што укажува на генерациски промени во најтесниот круг околу Ким. Меѓу сменетите функционери има високи воени претставници и долгогодишни парламентарни лидери, со што се испраќа порака за консолидација на власта.
Конгресот се одржува во период кога Пјонгјанг ја продлабочува соработката со Русија, вклучително и преку поддршка во војната во Украина, што дополнително ги влоши односите со САД и Јужна Кореја. Воедно, Ким ги интензивираше и контактите со Кина, со цел зајакнување на економската и политичката соработка.
Аналитичарите очекуваат дека во наредниот период ќе биде нагласена и стратегијата за економска самостојност, потпирајќи се на зголемена трговија со Кина и извоз на оружје, паралелно со амбициозните воени планови.
