Саудиска Арабија го задржува правото да преземе воена акција против Иран, а секоја доверба во односите со Техеран е нарушена, изјави рано утрово саудискиот министер за надворешни работи, откако Ријад беше цел на ирански балистички ракети.
Иран синоќа го обвини Израел дека ги нападнал неговите постројки во огромното гасно поле Јужен Парс, во голема ескалација на американско-израелската војна што доведе до нагло зголемување на цените на нафтата. Како одговор, Техеран најави напади врз нафтени и гасни цели низ Заливот, лансирајќи ракети кон Катар и Саудиска Арабија.
„Ќе им се врати како бумеранг“
Во најострите изјави од заливското кралство во речиси три недели војна, министерот го обвини Иран за однапред планирани непријателски дејства против своите соседи, директно и преку регионални сојузници.
„Овој притисок од Иран политички и морално ќе им се врати како бумеранг и ние секако го задржуваме правото да преземеме воени мерки доколку тоа се смета за неопходно“, изјави саудискиот министер за надворешни работи, принцот Фејсал бин Фархан, на прес-конференција по состанокот на високи дипломати од регионот во Ријад.
Министрите за надворешни работи од околу десетина земји, вклучително Турција, Обединети Арапски Емирати, Јордан, Катар и Сирија, се состанаа на консултативен состанок за војната со Иран, а во близина на хотелот каде што се одржуваше конференцијата можеше да се види противракетен оган.
Иран испалил стотици ракети и дронови
Саудиска Арабија од почетокот на конфликтот била нападната со стотици ирански ракети и дронови, а властите тврдат дека поголемиот дел од нив биле пресретнати. Сепак, вчерашните напади беа првпат многумина во градот да слушнат експлозии или да добијат предупредувања преку СМС.
Министерството за одбрана на Саудиска Арабија соопшти дека соборило четири балистички ракети насочени кон Ријад, а дел од остатоците паднале во близина на рафинерија јужно од градот.
„Ако Иран веднаш не застане…“
Саудиска Арабија и Иран ги обновија дипломатските односи во 2023 година, како дел од напорите за намалување на тензиите по години непријателство.
Бин Фархан рече дека Саудиска Арабија и натаму го претпочита патот на дипломатијата, но предупреди: „Ако Иран веднаш не застане, мислам дека речиси ништо нема да може повторно да ја врати довербата.“
