Европска комисија исплати 49 милиони евра на Албанија, 44,2 милиони евра на Црна Гора и 65,7 милиони евра на Северна Македонија во рамки на Инструментот за реформи и раст, познат како План за раст за Западен Балкан.
Средствата се исплатени откако Европската комисија оцени дека трите земји спровеле клучни реформи во области како конкурентност, иновации, образование и дигитализација.
План за раст за Западен Балкан
Европската унија го усвои Планот за раст во 2023 година со цел побрза економска и институционална интеграција на земјите-кандидати во единствениот пазар на ЕУ. Вкупно, на располагање се 6 милијарди евра, кои се исплаќаат во фази, зависно од спроведените реформи.
Колку пари се досега исплатени
- Албанија: 212,8 милиони евра
- Црна Гора: 89,3 милиони евра
- Македонија: 142,1 милион евра
Другите земји од регионот, вклучувајќи ги Србија, Босна и Херцеговина и Косово, исто така се дел од Планот за раст.
Во Албанија средствата се насочени кон подобрување на деловната клима, поддршка за иновации и стартапи, како и зелена и дигитална економија. Во Црна Гора фокусот е на зајакнување на научните институции и иновацискиот екосистем. Во Македонија средствата се насочени кон подобрување на образованието и дигиталната инфраструктура во училиштата.
Дел од средствата се пренесуваат директно во државните буџети, а дел се користат за инвестициони проекти преку Западнобалканскиот инвестициски рамковен механизам (WBIF).
