Иницијативата „Кој е следен?“ обединува студентски организации, граѓански активисти, невладини организации и поединци кои се разочарани од нефункционалноста на институционалниот систем, особено во правосудството, но и во сите сегменти на општествениот живот.
„Само првиот протест беше спонтан. Сите наредни се во наша организација. По масовниот протест што го организиравме, одлучивме да се повлечеме на вакви формални дискусии со граѓаните, за да можеме да формулираме конкретни барања и да бидеме поефикасни. Гневот е природен и треба да биде деструктивен, затоа што и системот е деструктивен кон нас. Но сега сакаме да бидеме конструктивни – да понудиме решенија за проблемите со кои се соочуваме“, истакнува Борјан Ефтимов, организатор на граѓанската иницијатива „Кој е следен?“.
На овие јавни форуми, активистите повикуваат експерти заедно да ги формулираат барањата, кои во недела, на вториот голем протест, ќе бидат презентирани пред јавноста.
Ефтимов нагласува дека е несоодветно да се напаѓаат одредени индивидуи кои се дел од борбата за правда.
„Сметам дека е несоодветно да се даваат коментари дека Тодор, таткото на Фросина, ги гуши протестите. Сите сме фрустрирани од системот, а секој ја носи својата болка на различен начин. Тој се бори против истиот систем против кој се бориме и ние. Начинот можеби е различен, можеби е ист, но целта ни е иста. Без разлика дали станува збор за родителите на жртвите во сообраќајот, граѓанските активисти или членовите на политичките партии – сите ние ја делиме истата фрустрација кон нефункционалниот систем, кој е подеднаква вина и на судската власт и на политичките елити“, додава тој.
Протестот има јасна политичка димензија, бидејќи се бори за промени во системот, но активистите инсистираат дека тој не смее да биде партизирана борба.
„Протестот сам по себе е политички чин, но тоа не значи дека треба да биде испартизиран. Токму тоа е она против што се бориме! Истакнувањето на барања е политички акт, но тоа не значи дека некоја партија треба да го преземе и да манипулира со граѓанската борба“, потенцира Ефтимов.
Иницијативата „Кој е следен?“ досега има подготвено преку 60 страници аргументи и барања, кои наскоро ќе бидат презентирани пред јавноста. Најважно во моментов, според нив, е поддршката од граѓаните.
„Во недела очекуваме уште помасовен протест! Ова е моментот кога сите треба да застанеме заедно, да покажеме дека бараме праведно општество и функционален систем. Граѓаните се оние што треба да ја дадат најсилната поддршка, затоа што ова е битка за сите нас“, порача Борјан Ефтимов.
Протестот е повик за акција, за промени, за правда. Недела е денот – граѓаните го имаат последниот збор!
