Администрацијата на Трамп планира веќе оваа недела да испрати до 9000 недокументирани мигранти во американскиот притворски центар во заливот Гвантанамо на Куба, објавија синоќа Washington Post и Politico.
Службеници изјавиле за медиумите дека меѓу странските државјани кои се разгледуваат за трансфер во објектот има мигранти од Белгија, Обединетото Кралство, Франција, Германија, Хаити, Ирска, Литванија, Холандија, Полска, Турција и Украина.
Од февруари, Соединетите Американски Држави (САД) држеле околу 500 мигранти во заливот Гвантанамо, но извори запознаени со трансферот изјавиле дека објектот се подготвува за медицински преглед на 9000 луѓе за да се утврди дали се доволно здрави за да бидат испратени таму.
Злогласната историја на заливот Гвантанамо датира од периодот по терористичките напади врз САД на 11 септември 2001 година, кога таму беа испраќани голем број осомничени терористи по нивното заробување од страна на американската војска.
Американскиот претседател Доналд Трамп во јануари најави дека планира да го користи притворскиот центар за трансфер на недокументирани имигранти. Трансферите би можеле да започнат веќе во среда, со план за привремено сместување на притворениците во Гвантанамо пред нивна депортација во земјите на потекло.
Овој потег е дел од акцијата на претседателот за сузбивање на нелегалната имиграција, со поттикнување на рации од Службата за имиграција и царина (ICE) со цел повеќе апсења и депортации на недокументирани имигранти. „Под водство на претседателот Трамп сакаме да поставиме цел од најмалку 3000 апсења дневно за ICE“, изјави заменик-шефот на персоналот на Белата куќа, Стивен Милер, за Fox News минатиот месец, додавајќи дека администрацијата планира да го зголеми тој број.
Официјалната причина за трансферот е ослободување на простор во притворските центри на континенталниот дел од САД, а документи добиени од Politico и Washington Post сугерираат дека Министерството за внатрешна безбедност (DHS) можеби нема однапред да ги информира земјите на притворените мигранти за нивниот трансфер во заливот Гвантанамо.
Повеќето трансфери доаѓаат од земји пријателски кон САД и од европски држави, што предизвикало вознемиреност кај некои американски дипломати, а некои службеници од Стејт департментот задолжени за европски прашања наводно се обидуваат да го убедат DHS да се откаже од планот. „Пораката е да се шокираат и исплашат луѓето, да се вознемират. Но ние сме сојузници“, изјавил еден службеник од Стејт департментот за Politico.
Американската унија за граѓански слободи (ACLU) поднела тужба со која сака да го спречи Владата да ги префрли притворениците во Гвантанамо. Случајот сè уште е во тек. „Владата нема утврдено легитимна цел за држење на имиграциските притвореници во Гвантанамо, наместо во притворски центри внатре во САД“, се наведува во тужбата.
