Џоломарите од кавадаречките села Сопот и Бегниште, денеска заминаа на тридневниот карневал во бугарскиот град Перник, каде традиционално учествуваат голем број карневалски групи од светот. Станува збор за најголемиот карневал под маски во Европа, што постои од 1966 година, а годинава ќе учествувале илјадници учесници, од повеќе карневалски групи.
„Со кожувчиња, грпки и бради, исцрнети лица од саѓи, клопотарци и стапови со кои се прави врева, џоломарите бркаат лоши духови, прават место за добрите нешта. Секоја од карневалските групи ги носи со себе и сопствените автентични традиционални игри и обичаи со маски“, рекоа џоломарите за МИА.
Претседателот на карневалската група Сопот Тиквеш, Миле Грозданов изрази задоволство од учеството на овој меѓународно познат карневал и нагласи дека благодарение на долгогодишната соработка помеѓу карневалските групи, дошло и до збратимување помеѓу Кавадарци и бугарскиот град.
Орданчо Лазаров, претседател на џоломарската група од Бегниште, додаде дека се работи за фестивалот познат како Сурва, каде тие традиционално учествуваат.
