Неспремноста на Техеран да капитулира додека војната влегува во четвртата недела е поврзана со неговата контрола врз Ормускиот теснец, велат регионални функционери.
Како што војната во Иран продолжува, а американските операции сè повеќе се насочени кон глобалните енергетски текови, Техеран одбива обиди за дипломатско решение на конфликтот што го започнаа САД и Израел, пренесува Вашингтон пост.
Наместо тоа, Иран ги засилува нападите врз соседите, пресметувајќи дека може побрзо да изврши глобален економски притисок отколку што администрацијата на американскиот претседател Доналд Трамп може да го неутрализира со воена сила, велат извори од регионот.
Клучна улога на Ормускиот теснец
Неспремноста на Иран да попушти е тесно поврзана со неговото влијание врз Ормускиот теснец, низ кој минува околу една петтина од светските испораки на гориво.
Техеран делумно го затвори овој клучен морски коридор, со што ги потресе глобалните енергетски пазари.
Американскиот претседател Доналд Трамп му даде рок од 48 часа на Иран да го отвори теснецот, заканувајќи се со уништување на електраните ако тоа не се случи.
Иран, пак, со овој потег сака „да ја направи агресијата исклучително скапа за напаѓачите“, изјавил ирански дипломат.
Стратегија: економски притисок наместо повлекување
Иранското раководство ја гледа способноста да го контролира теснецот и да издржи напади како краткорочна победа.
„Додека режимот постои, може да создава страв во регионот и да ги дестабилизира пазарите на нафта и гас. За нив тоа е победа“, изјавил европски дипломат.
Според него, Техеран во моментов не чувствува притисок да преговара.
Обиди за примирје – без успех
Функционери од Катар и Оман се обиделе да посредуваат за примирје, проценувајќи дека ниту силната американско-израелска воена кампања не може брзо да ја собори иранската власт.
Иран одговорил дека е подготвен за разговори само ако САД и Израел први ги прекинат нападите.
Техеран, исто така, би барал гаранции за ненапаѓање и финансиска компензација.
Големи загуби, но и ескалација
Според Пентагон, САД и Израел погодиле повеќе од 15.000 цели во Иран, уништувајќи воена инфраструктура и ликвидирајќи високи функционери.
Иранските власти наведуваат дека загинале повеќе од 1.200 цивили.
Во последната недела убиени се и неколку високи функционери, меѓу кои и Али Ларијани.
Конфликтот се проширил и врз енергетската инфраструктура во регионот – Иран возвратил со напади врз Катар, Саудиска Арабија и Кувајт, по нападите врз гасното поле Јужен Парс.
Ризик од понатамошна ескалација
Аналитичарот Алан Ејр од Институтот за Блискиот Исток предупредува дека ситуацијата и понатаму се движи кон ескалација.
Иранското раководство верува дека може да го принуди Доналд Трамп на повлекување преку зголемување на економскиот притисок.
Сепак, и покрај јавните пораки на инает, во Техеран постои загриженост за долгорочните последици – особено за внатрешна нестабилност и можни нови протести.
„Најкритичниот момент за нив не е за време на бомбардирањето, туку по неговото завршување“, вели еден аналитичар.
