Студенти од повеќе факултети во Белград денеска организираат протест под мотото „Знаењето е моќ“, со централно собирање пред зградата на Ректоратот на Универзитетот во Белград во 18 часот. Протестот е организиран во знак на поддршка на професорката Јелена Клеут и нејзините колеги од Филозофскиот факултет во Нови Сад.
Воедно, студентите на Правниот факултет, Архитектонскиот факултет и Факултетот за политички науки (ФПН) најавија бојкот на наставата, солидаризирајќи се со студентите и наставниците од Филозофскиот факултет во Нови Сад, кои бараат враќање на работа на отпуштената професорка.
Собири на повеќе локации во градот
Околу 17 часот започнаа собири на повеќе локации низ Белград, од каде што студентите и граѓаните треба организирано да се упатат кон Ректоратот, кој се наоѓа на Студентскиот плоштад.
Главна точка на собирање е просторот пред Правниот факултет, каде што веќе се собраа неколку стотици луѓе. Засега не е блокиран сообраќајот, а во близина нема забележливо присуство на полициски единици, освен неколку возила на сообраќајната полиција.
Зголемено полициско присуство е забележано во реонот околу Домот на Народното собрание, во чија близина се наоѓа камп на поддржувачи на власта во Пионирскиот парк.
Планирано е колоната од Правниот факултет да се движи по Булеварот крал Александар, покрај Собранието и Плоштадот на Републиката, до Студентскиот плоштад. По официјалниот почеток на протестот, најавена е и протестна прошетка до Храмот Свети Сава, преку улицата Крал Милан и плоштадот Славија.
Собири се најавени и на кружниот тек во Нов Белград, во Паркот Милутин Миланковиќ на Вождовац, како и пред Првата белградска гимназија.
„Без знаење нема слобода“
Студентите на социјалните мрежи порачаа дека протестот се одржува на Св Сава, училишната слава, со јасна порака:
„Време е да ја вратиме вербата во образованието и стручноста и повторно да ги поставиме како темел на нашето општество. Без знаење нема слобода, без право нема држава, а без одговорност нема заедница.“
Тие нагласуваат дека државата мора да се темели на образованието, науката и континуираното учење.
Како симболична порака, студентите објавија и архивски снимки од студентскиот протест на 27 јануари 1997 година, на кој присуствувал и тогашниот патријарх Павле.
Продолжува бојкотот на наставата
Студентите на Факултетот за политички науки најавија целонеделен бојкот на наставата, од 27 јануари до 1 февруари. Во знак на солидарност, бојкотирана е наставата и на други факултети низ Србија, поради отпуштања и притисоци врз универзитетски професори.
Независниот синдикат на Филозофскиот факултет во Нови Сад најави и едночасовни протести секоја среда, поради, како што наведуваат, континуирано нарушување на автономијата на универзитетот и политички притисоци врз академската заедница.
