Украинскиот претседател Володимир Зеленски понуди испраќање на најдобрите украински експерти за пресретнување и соборување ирански дронови на Блискиот Исток, но под еден услов – лидерите од регионот да го убедат рускиот претседател Владимир Путин да прифати едномесечно примирје во војната против Украина, јавува „Блумберг“.
Четиригодишната руска целосна инвазија ѝ овозможи на Украина да развие уникатно искуство во пресретнување беспилотни летала, вклучително и иранските дронови од типот „Шахед“, кои во моментов се користат во напади врз земји како Обединетите Арапски Емирати, Катар и Саудиска Арабија, изјави Зеленски во понеделникот.
„Лидерите на Блискиот Исток имаат добри односи со Русија“
„Би предложил следново: лидерите на Блискиот Исток имаат добри односи со Русите“, изјави Зеленски во телефонски разговор за „Блумберг“ од Киев. „Тие можат да побараат од Русија да спроведе едномесечно примирје.“
Откако примирјето би стапило во сила, „ќе ги испратиме нашите најдобри оператори за пресретнување дронови во земјите од Блискиот Исток“, рече Зеленски. Тој додаде дека примирјето може да трае и два месеца или две недели, „за да можеме да им помогнеме на земјите од регионот во заштитата на цивилите“.
Зеленски ја изнесе оваа понуда откако градови низ Блискиот Исток, вклучително и Дубаи, за време на викендот беа цел на ирански напади со дронови и ракети. Техеран возврати на американските и израелските воени удари во кои беа убиени врховниот лидер ајатолахот Али Хамнеи и други високи функционери.
Москва досега одбиваше примирје
Русија во повеќе наврати ги одби повиците на американскиот претседател Доналд Трамп за примирје во Украина, додека Вашингтон се обидуваше да посредува во постигнување мировен договор. Засега не е јасно зошто Путин би прифатил ваков предлог.
Рускиот претседател во понеделникот одржа телефонски разговори со лидерите на неколку заливски држави погодени од иранските напади, меѓу кои Бахреин, Обединетите Арапски Емирати и Катар. Портпаролот на Кремљ, Дмитриј Песков, изјави дека Москва е „во постојан контакт со иранското раководство“.
„Сигурно е дека ОАЕ, Саудиска Арабија и Катар имаат добри, пред сè економски односи со Путин“, изјави Зеленски, додавајќи дека Украина може да му помогне и на Израел на сличен начин.
