Во своето традиционално божиќно обраќање до нацијата, украинскиот претседател Володимир Зеленски порача дека Украинците оваа година имаат една заедничка желба – крај на војната и мир за земјата, со јасна алузија на судбината на рускиот претседател Владимир Путин.
„Од дамнина, Украинците веруваат дека на божиќната ноќ небесата се отвораат. И ако тогаш му ја кажеш својата желба, таа ќе се исполни. Денес, сите ние имаме еден сон. И една желба – за сите нас“, рече Зеленски во обраќањето на Бадник.
Без директно да го именува Путин, украинскиот претседател додаде: „‘Нека исчезне’, можеби секој од нас си помислува во себе. Но, кога му се обраќаме на Бога, бараме нешто поголемо“. Зеленски нагласи дека Украинците бараат и се борат за мир, додавајќи дека народот го заслужува.
Тој говореше и за секојдневните желби на граѓаните – секое семејство да живее во слога, секое дете да се радува на подароци и насмевки, и луѓето повторно да имаат вера во добрината и чудата, и покрај војната што трае речиси четири години.
Без прекин на огнот за Божиќ
Зеленски потсети дека Русија и оваа година не прифатила божиќен прекин на огнот, туку, како и во претходните години, го искористила празничниот период за напади врз Украина. Од почетокот на целосната инвазија во 2022 година, Божиќ редовно минува под сирени и експлозии.
На 25 декември 2022 година, за време на првиот воен Божиќ, Русија изврши масовен ракетен и дронски напад врз енергетската инфраструктура, што доведе до големи прекини на струја и цивилни жртви. Во 2023 година, дронски напади во Херсон убија четири лица, токму кога Украина за првпат официјално го одбележа Божиќ на 25 декември, наместо на 7 јануари.
Минатата година, според украинските власти, Русија лансирала повеќе од 70 ракети и над 100 дронови на Божиќ, при што загинало најмалку едно лице, а над половина милион луѓе во Харкивска област останале без греење.
„За четврта година по ред , четврта година од војната за независност, има обиди да ни се одземе сето ова“, рече Зеленски. „И токму тоа го браниме денес: нашата земја, нашите семејства и чувството на мир во сопствениот дом“.
Напади продолжуваат додека траат разговори за мир
Божиќното обраќање дојде во ден кога Зеленски ги откри деталите од ревидираниот мировен план што се разгледува со САД, наведувајќи дека Киев и Вашингтон постигнале консензус за неколку клучни точки. Сепак, прашањата за територијалната контрола во источна Украина и управувањето со Нуклеарната централа Запорожје остануваат нерешени.
Истовремено, украинските воздухопловни сили соопштија дека Русија на Бадник лансирала 131 дрон кон Украина. Во нападите загинале две лица, а 35 биле повредени во повеќе региони, меѓу кои Запорожје, Одеса и Суми, според регионалните власти.
„Се надеваме дека добрината и вистината ќе победат. Дека ќе има победа на мирот. Дека ќе нè има нас. И дека ќе ја има Украина“, порача Зеленски на крајот од обраќањето.
