Ден Бонџино објави дека во јануари ја напушта функцијата заменик-директор на Федералното истражно биро (ФБИ). Во објава на социјалната мрежа X тој му се заблагодари на претседателот Доналд Трамп, на директорот на ФБИ и на главната државна обвинителка за „можноста да служи со цел“, пренесува BBC.
Неговата објава уследи кратко откако Трамп изјави дека поранешниот водител на подкаст „завршил одлична работа“ на функцијата и дека „сака да се врати на својата емисија“.
Популарност стекната преку подкаст
Бонџино, кој беше именуван на функцијата во февруари од страна на Трамп, претходно работел како полицаец во Њујорк и како агент на Тајната служба, задолжен за заштита на поранешниот претседател Барак Обама. Во последните години стекна голема популарност преку својот подкаст и бројни медиумски настапи.
Како жесток сојузник на Трамп, без претходно искуство во самата агенција, Бонџино важеше за изненадувачки избор за функција што традиционално ја извршуваат кариерни агенти. На неговото именување се спротивстави и Здружението на агенти на ФБИ, кое претставува околу 14.000 сегашни и поранешни агенти.
Во објавата за својата оставка, Бонџино напиша:
„Во јануари ја напуштам мојата позиција во ФБИ. Сакам да му се заблагодарам на претседателот Трамп, на главната државна обвинителка Пам Бонди и на директорот Каш Пател за можноста да служам со цел. Најмногу од сè, им благодарам на вас, моите сограѓани Американци, за привилегијата да ви служам. Бог да ја благослови Америка и сите што ја бранат.“
Теоретичар на заговори
Пред да се приклучи на ФБИ, Бонџино често ширеше дезинформации и теории на заговор, вклучително и лажните тврдења на Трамп дека победил на претседателските избори во 2020 година. Случајот со импровизирани бомби поставени на 6 јануари 2021 година претходно го нарече „внатрешна работа“.
По преземањето на функцијата, сепак, се залагаше токму таа истрага – за која главната обвинителка Бонди изјави дека „стагнирала“ – да стане приоритет на ФБИ. Рано овој месец беше уапсен маж без познати врски со владата, речиси шест години по откривањето на бомбите пред седиштата на Републиканската и Демократската партија.
Пофалби од директорот на ФБИ
Директорот на ФБИ, Каш Пател, го пофали мандатот на Бонџино, велејќи дека тој „служел како глас на народот за транспарентност“ и дека донел значајни откритија во долго нерешени случаи, вклучително и истрагата за импровизираните бомби.
„Не само што ја исполни својата мисија – тој далеку ја надмина“, напиша Пател.
Случајот Епстин: промена на ставот
Се чини дека Бонџино го променил ставот и за смртта на сексуалниот престапник Џефри Епстин откако станал дел од раководството на ФБИ. Како медиумски коментатор, тој јавно се сомневаше дека Епстин извршил самоубиство во затворската ќелија во Њујорк во 2019 година.
Но, во мај годинава изјави: „Го видов целиот досие. Се уби.“
Во јули, Министерството за правда и ФБИ објавија допис во кој се наведува дека Епстин навистина извршил самоубиство и дека не постоел никаков „список на клиенти“. Тоа предизвика незадоволство кај дел од поддржувачите на Трамп кои продолжија да веруваат во теории на заговор. Според CBS News, дописот довел и до напнат состанок меѓу Бонџино и обвинителката Бонди.
И покрај наводните несогласувања, Бонди во средата кратко напиша на X дека „Американците се побезбедни“ благодарение на службата на Бонџино.
