Глобалните финансиски пазари се под силен притисок откако ескалацијата на војната во Иран избриша околу шест билиони долари од вредноста на светските акции. Инвеститорите сè повеќе стравуваат од стагфлациски шок комбинација од раст на цените на енергијата и забавување на економијата.
Пазарите бурно реагираа на изјавата на американскиот претседател Доналд Трамп дека цената на нафтата од 100 долари за барел е „мала цена за безбедност и мир“.
Цената на суровата нафта Brent денес скокна за околу 29 проценти, што е најголем еднодневен раст во последните речиси шест години. Со тоа цената се приближи до нивото од 120 долари за барел.
Нападите врз енергетската инфраструктура во Иран дополнително ги зголемија стравувањата од долгорочни нарушувања во глобалното снабдување со нафта, па инвеститорите почнаа масовно да продаваат акции.
Азиските берзи во еден момент изгубија околу 5,6 проценти од вредноста, што е најголем дневен пад од април, додека побарувачката за „сигурни засолништа“ ја зголеми вредноста на американскиот долар.
Енергетскиот шок особено ја погодува Азија, бидејќи голем дел од увозот на нафта и течен природен гас поминува низ Ормускиот теснец, кој се наоѓа во центарот на конфликтот.
Аналитичарот Раџив де Мело од компанијата Gamma Asset Management изјави дека најголемиот проблем е стагфлациската природа на кризата – истовремено забавување на економскиот раст и зголемување на инфлацијата.
Поради растот на инфлаторните ризици, инвеститорите ги променија и очекувањата за намалување на каматните стапки во САД. Наместо во јули, пазарите сега проценуваат дека Федералните резерви би можеле да ги намалат каматите дури во септември.
Експертите предупредуваат дека доколку конфликтот продолжи, постои сериозен ризик од глобална рецесија или стагфлација, особено ако цените на нафтата останат на сегашните високи нивоа.
