Силен земјотрес со јачина од 6,2 степени според Рихтеровата скала го погоди Истанбул во средата, при што најмалку 236 лица се повредени, соопштија властите.
Епицентарот на земјотресот бил во истанбулската општина Силиври, според Управата за катастрофи и вонредни состојби (AFAD). Земјотресот се почувствувал низ цел Истанбул, кој има над 15 милиони жители, како и во соседните провинции, што предизвикало паника меѓу граѓаните кои масовно излегувале од згради, јавува агенцијата Анадолија.
Земјотресот се случил на длабочина од речиси 7 километри и траел 13 секунди, изјави министерот за внатрешни работи Али Јерликаја.
Од канцеларијата на гувернерот соопштија дека 236 лица се повредени, најчесто поради скокање од височина во обид да избегаат од објекти во паника. Сите се хоспитализирани, но нема животно загрозени.
Министерот Јерликаја додаде:
„Од 17:55 часот регистрирани се 127 последователни земјотреси, од кои најсилниот бил со јачина од 5,9 степени.“
Министерот за животна средина, урбанизам и климатски промени Мурат Курум изјави дека до сега се примени вкупно 378 извештаи за оштетувања на конструкции, поднесени преку доверливи барања до итната линија.
„Нашите екипи од Покраинската управа за животна средина и урбанизам идентификуваа потреба за евакуација на девет куќи,“ додаде Курум.
AFAD соопшти дека по проценка на сите примени пријави од Центарот за итни случаи 112, засега нема извештаи за човечки жртви или големи разурнувања.
AFAD ги мобилизира сите релевантни институции и спасувачки тимови, и во тек е теренско скенирање за проценка на штетите и обезбедување на јавна безбедност.
Граѓаните се повикуваат: да не влегуваат во оштетени или потенцијално оштетени објекти, да избегнуваат непотребна употреба на возила, и да не ги користат мобилните мрежи освен за итни случаи.
Претседателот на Турција, Реџеп Таип Ердоган, изјави:
„Упатив добри желби до нашите граѓани, внимателно го следиме развојот на настаните.“
