На почетокот на секој ноември веќе 20 години се лансира глобалната кампања за машко здравје со слоганот „Movember“ („моември“). Карактеристичен знак на кампањата „моември“ е раснењето мустаќи кај мажите. Затоа првата анкета во ноември на „Внимание, внимание“ ги прашува граѓаните: Зошто мажите пуштаат бркови во ноември? Кога последен пат биле на преглед за простата или тестиси? Зошто ноември го викаат „мовембер“ („моември“)? Доктор за женско здравје е гинеколог, за машко здравје кој би бил? Како мажите да се мотивираат почесто да се грижат за своето здравје?
Дел од граѓаните се свесни за кампањата „моември“, но дел сметаат дека е помодарство, или кампања за машкоста и мажите – а не за подигнување на свеста за здравјето на мажите. Дел од анкетираните се скептични дека мажите можат да се мотивираат повеќе да се грижат за своето здравје, но дел гласно кажуваат: дека е потребна поголема едукација и јавни кампањи, за мажите да не се срамат да отидат на лекар, да ги надминат табуата, да одат редовно на прегледи и контроли, да го надминат стравот што ќе речат другите, а и да бидат охрабрени од нивните партнери.
Анкетата „Внимание, внимание – зборуваат граѓаните“, се емитува на каналите на „Трн“ (на Фејсбук, YouTube, и на Инстаграм) и нејзината цел е да се чуе гласот на граѓаните, посебно на младите. Гласот на граѓаните нѝ го претставува артистот Дениз Абдула, а продукцијата е на „Трн.мк“.
