Компаниите Visa и Mastercard се согласија да исплатат 167,5 милиони долари како дел од спогодба за колективна тужба, во која се обвинети за заговор со цел одржување вештачки високи надоместоци за користење на банкомати.
Спогодбата, која сè уште чека одобрување од судија, е поднесена до Сојузниот окружен суд во Вашингтон, пренесува The Guardian.
Средствата ќе бидат исплатени на милиони сопственици на платежни картички, кои плаќале надоместоци при подигнување готовина од независни банкомати (не во сопственост на банки). Visa ќе уплати 88,8 милиони долари, а Mastercard 78,7 милиони долари. Исплатата се однесува на трансакции од октомври 2007 година наваму.
Адвокатите на тужителите ја оценуваат спогодбата како „одличен резултат со оглед на ризиците од понатамошно судење“. Тие ќе побараат до 30% од фондот, односно околу 50 милиони долари за покривање на судските трошоци.
⚖️ Долгогодишна правна битка
Тужбата е поднесена уште во 2011 година, откако потрошувачите ги оспорија правилата на Visa и Mastercard кои наводно спречувале независни оператори на банкомати да нудат пониски такси. Двете компании цело време ги негирале обвинувањата.
Ова е еден од три поврзани случаи пред сојузниот суд во Вашингтон. Минатата година Visa и Mastercard веќе исплатија 197,5 милиони долари за слични тужби од друга група корисници, а неколку банки во 2021 година исплатија 66 милиони долари.
Третата тужба, поднесена од независни сопственици на банкомати, сè уште чека разрешница, додека Visa се соочува и со други антимонополски постапки, вклучувајќи тужба од Министерството за правда на САД за наводна незаконска монополизација на пазарот на дебитни картички.
