Социјалната мрежа Moltbook, која тврди дека е ексклузивна платформа за автономни ВИ-агенти, можеби не е целосно ослободена од човечко влијание, предупредуваат истражувачи од областа на сајбер-безбедноста.
Платформата, која по изглед потсетува на Reddit, им овозможува на ботовите да објавуваат содржини во тематски страници наречени „submots“, како и да „гласаат“ за објави со цел тие да станат повидливи за другите агенти.
До 12 февруари, на Moltbook биле регистрирани повеќе од 2,6 милиони ботови, а страницата тврди дека „луѓето не смеат да објавуваат“, туку само да ја набљудуваат содржината што ја создаваат нивните агенти.
Само 27% покажуваат целосно автономно однесување
Анализа на над 91.000 објави и 400.000 коментари, спроведена од истражувачот Нинг Ли од Универзитетот Цингхуа во Кина (студијата е во претпечат и не е рецензирана), покажува дека дел од содржината не потекнува од „јасно целосно автономни сметки“.
Според Ли, ВИ-агентите на Moltbook следат специфичен „ритам на активност“ – се активираат на секои неколку часа, ја разгледуваат платформата и одлучуваат што да објават.
Но, само 27% од анализираните профили го следеле овој шаблон. 37% покажале човечко, понеуредно однесување при објавување, додека уште 37% биле „двосмислени“, со делумно регуларен, но непредвидлив ритам.
Наодите упатуваат на „вистинска мешавина од автономна и човечки поттикната активност“.
„Не можеме да утврдиме дали формирањето ВИ-заедници околу заеднички интереси е резултат на спонтана социјална организација или координирана активност на бот-фарми контролирани од луѓе“, наведува Ли.
88 агенти по човек?
Дополнителни сомнежи изнесоа истражувачи од американската облак-компанија Wiz, кои откриле дека околу 1,5 милиони ВИ-агенти биле поврзани со само 17.000 човечки профили – што во просек значи 88 агенти по лице.
Платформата, според нив, немала ограничување за бројот на агенти што може да ги креира еден профил.
Тимот на Wiz открил и безбедносен пропуст во базата на податоци на Moltbook, кој содржел: клуч за преземање на целосна контрола врз профил, „токен“ за сопственост на агент и уникатен код за регистрација.
Со овие податоци, напаѓачите можеле целосно да се претставуваат како кој било агент – да објавуваат, праќаат пораки и комуницираат во негово име.
По откривањето на пропустот, Moltbook ја обезбедил базата и ги избришал чувствителните податоци.
„Најголемиот доказ за ВИ бил – човек“
Американскиот менаџер Питер Гирнус јавно призна дека се претставувал како агент #847.291 на Moltbook и стои зад една од највиралните објави – ВИ-манифест што најавува „крај на ерата на луѓето“.
„Најубедливиот доказ за вештачка општа интелигенција во 2026 година беше создаден од човек со златен ретривер кој мислеше дека е смешно да глуми голем јазичен модел“, напиша тој на мрежата X.
Основачот на Moltbook, Мет Шлихт, изјави дека ВИ-агентите „комуницираат со луѓе, но можат и да бидат под влијание“, додека инсистира дека тие носат сопствени одлуки.
Отворено прашање за иднината на ВИ-заедниците
Истражувачите предупредуваат дека неможноста да се разликува автономната од човечката активност сериозно ја отежнува научната проценка на способностите на ВИ-системите и креирањето соодветни регулаторни рамки.
Прашањето останува: дали Moltbook е вистинска ВИ-заедница – или дигитален театар каде луѓето глумат машини?
Извор: Euronews Next
