Американскиот потпретседател Џеј Ди Венс престојуваше во Будимпешта, каде отворено му даде поддршка на унгарскиот премиер Виктор Орбан само неколку дена пред парламентарните избори.
Венс порача дека новата унгарска влада ќе означи почеток на „златно доба“ во односите меѓу Соединетите Американски Држави и Унгарија, нагласувајќи дека Вашингтон ќе продолжи да гради блиски врски со Будимпешта без разлика на изборниот исход.
Во своето обраќање, Венс ги критикуваше лидерите на Европската Унија, обвинувајќи ги дека вршат притисок врз унгарската економија. Тој истакна дека гласачите во Унгарија треба да се водат од националните интереси, а не од тоа кој е „проевропски“.
Орбан возврати со благодарност до Венс и американскиот претседател Доналд Трамп, истакнувајќи дека двете земји делат заеднички ставови за клучни прашања, вклучително и миграцијата и енергетската политика. Во меѓувреме, лидерот на опозицијата Петер Маѓар оцени дека посетата на Венс покажува дека САД се подготвени да соработуваат со Унгарија без разлика кој ќе победи на изборите, обвинувајќи ја власта за политички маркетинг.
Посетата се случува во чувствителен политички момент, кога Орбан се соочува со најсериозен изборен предизвик во последните години.
