Најмалку три лица загинаа во невремето предизвикано од ураганот „Хелена“, кој ги погоди САД и е најсилниот што досега ја погодил областа Биг Бенд на Флорида. Хелена синоќа стигна во северозападна Флорида како бура од четврта категорија.
Националниот центар за урагани во Мајами соопшти дека Хелена синоќа ја погодила областа во близина на реката Аусила во областа Биг Бенд во Мексиканскиот залив. Брзината на ветрот била 225 километри на час.
Поради Хелена властите издадоа предупредувања за урагани и поплави кои се проширија во северна Џорџија и западна Северна Каролина. Повеќе од милион домови и фирми останаа без струја на Флорида и повеќе од 50.000 во Џорџија.
Гувернерите на американските сојузни држави Флорида, Џорџија, Алабама, Каролина и Вирџинија прогласија вонредна состојба во нивните држави.Издадени се наредби за евакуација долж брегот на Заливот во ниските области околу Талахаси, Гејнсвил, Седар Ки, Лејк Сити, Тампа и Сарасота на Флорида
Една жена загина на Флорида кога сообраќаен знак паднал врз нејзиниот автомобил, а две лица загинале во јужна Џорџија.
Националната метеоролошка служба прогнозираше бури и предупреди дека тие би можеле да бидат „катастрофални“ во заливот Апалачи, во близина на брегот на Флорида. Училиштата во округот и неколку универзитети ја откажаа наставата, а аеродромите во Тампа, Талахаси и Клирвотер се затворени.
Метеоролозите предвидуваат дека Хелена најверојатно ќе ослабне додека се движи кон внатрешноста, но дека силните ветрови и дождот ќе се прошират на јужните Апалачки планини, каде што ќе биде можна и појава на лизгање на земјиштето.
