Пакетот помош на Европската унија вреден 90 милијарди евра, кој во моментов го блокира Унгарија, е клучен за Киев во, како што оцени, „многу тешка“ ситуација во борбата против Русија, изјави во четвртокот претседателот Володимир Зеленски.
Во обраќањето до Европскиот совет, тој додаде дека Украина успешно соработува со ЕУ на поправка на нафтоводот „Дружба“, кој бил оштетен од Русија, како и дека од САД добил сигнали за можен скорешен продолжеток на мировните преговори со Москва, пишува Reuters.
Напнат ден во Брисел, повеќе кризи на маса
Да потсетиме, самитот на лидерите на Европската унија, кој се одржува оваа недела, прерасна од економски состанок во соочување со низа кризи – од помошта за Украина и конфликтот на Блискиот Исток до тензиите со САД и внатрешните поделби околу енергетиката и климата.
Клучното прашање е пакетот помош за Украина од 90 милијарди евра, кој го блокира Унгарија поради спор околу снабдувањето со нафта. Во исто време, ЕУ се двоуми околу поголем ангажман во Ормускиот теснец, што дополнително ги заострува односите со Вашингтон.
Унгарија забрани влез за Украинци
Покрај тоа, Унгарија им забрани влез во земјата и во шенген-зоната на тројца украински државјани поради наводни закани кон премиерот Виктор Орбан и неговото семејство. Меѓу нив има двајца војници и еден политички аналитичар, а унгарските власти тврдат дека споменувале и можност за воен напад.
