Две силни експлозии одекнаа вчера наутро во населбата Афипски во рускиот Краснодарски крај, а целта беше воената база на 90-та противвоздушна ракетна бригада. Главната разузнавачка дирекција (ХУР) на Украина ја презеде одговорноста за нападот во кој, според нивните тврдења, загинаа најмалку 12 руски војници, а десетици беа ранети, пишува Киев пост .
Извор од ХУР потврди за споменатиот медиум дека во нападот е уништена и воената опрема што се наоѓала во базата.
По експлозиите, локалните медиуми и каналите на социјалните мрежи брзо ја објавија веста, по што руските безбедносни служби ја опколија областа околу базата и воведоа режим на „антитерористичка операција“.
Очевидци пријавија голем број амбулантни возила и специјални служби во близина на контролниот пункт. Во исто време, според ХУР, руските власти се обидуваат да ја прикријат саботажата. Во медиумите се појави приказна дека експлозиите наводно биле предизвикани од неисправна гасна опрема на едно од возилата, додека ФСБ активно работи на отстранување на какво било споменување на инцидентот од вестите и социјалните мрежи.
Извори од ХУР забележуваат дека 90-та противвоздушна ракетна бригада, која била цел на операцијата, учествувала во руската вооружена агресија врз Украина на бојните полиња во Херсонската и Запорошката област. Населбата Афипски, каде што се наоѓа базата, се наоѓа на околу 500 километри од Украина и приближно 1.200 километри јужно од Москва.
