Украина соопшти дека извела напади длабоко на територијата на Русија, при што биле погодени складиште за нафта во Липецката област и магацин за ракети и муниција во Костромската област.
Според извор од Службата за безбедност на Украина (СБУ), дронови со долг дострел на Центарот за специјални операции „Алфа“ успешно дејствувале врз две, како што се наведува, „непријателски цели во длабочината на руската позадина“.
Како резултат на нападот, во складиштето за нафта избувнал пожар, додека во магацинот за ракети и муниција дошло до силни експлозии. Според украинските тврдења, погодениот магацин имал клучна улога во снабдувањето на руските сили што дејствуваат во западниот и централниот правец.
Украинските власти наведуваат дека ваквите операции имаат за цел да ја ослабат логистиката и воените капацитети на Русија, особено во заднината на фронтот. Руските власти засега немаат официјален коментар за наводите за нападите.
