Министерот за надворешни работи на Турција, Хакан Фидан, денес соопшти дека Турција го затвора својот воздушен простор за авионите на израелската влада, како и за секој транспорт на оружје наменет за израелската војска. Покрај тоа, Анкара ги затвора своите пристаништа за поморска трговија меѓу трети земји и Израел.
Турција остро го критикува водењето на војната во Газа од страна на Израел, при што претседателот Реџеп Таип Ердоган неколкупати ги нарече израелските дејства „геноцид“, споредувајќи го премиерот Бенјамин Нетанјаху со Хитлер.
Турција ги прекина сите директни трговски врски со Израел во мај минатата година, барајќи постојан прекин на огнот и итен влез на хуманитарна помош во Газа.
Минатата недела, турските медиуми објавија дека веќе е воведена забрана за поморски сообраќај поврзан со Израел, иако тогаш немаше официјална потврда од властите.
