Три американски сојузни држави — Западна Вирџинија, Јужна Каролина и Охајо — најавија дека ќе испратат стотици припадници на своите Национални гарди во Вашингтон. Овој потег доаѓа по наредба на претседателот Доналд Трамп, кој преку извршна уредба ја федерализираше локалната полиција во главниот град, предизвикувајќи жестоки реакции од јавноста и политичарите.
Западна Вирџинија ќе испрати меѓу 300 и 400 гардисти, Јужна Каролина 200, а Охајо најави 150 во наредните денови. Оваа интервенција се оправдува од администрацијата како начин да се врати “јавната безбедност”, иако статистиките на полицијата во DC покажуваат дека насилниот криминал е на најниско ниво во последните 30 години, со дополнително намалување од 26% од јануари наваму.
Трамп изјави дека Националната гарда ќе помогне да се справи со кризата со криминалот и бездомништвото, и издаде наредба за отстранување на бездомниците, по што неколку импровизирани кампови беа демонтирани. Во меѓувреме, протестите се засилија, особено откако во саботата демонстранти маршираа од Dupont Circle до Белата куќа со транспаренти „Нема фашистичко преземање на DC“ и „Нема воена окупација“.
Пратените гардисти се моментално ангажирани во јавни простори, најмногу на административни и логистички задачи, и според Пентагон, не носат оружје, освен ако тоа не биде неопходно. Сепак, се разгледува наредба за овластување за носење оружје за воената полиција.
Правната битка исто така е во тек — Министерството за правда на САД се обиде да ја замени началничката на полицијата во Вашингтон со шефот на DEA, но главниот обвинител на DC ја оспори оваа мерка пред федерален суд. Судијката Ана Рејес пресуди дека началничката Памела Смит останува на функцијата засега.
Организации како Chamberlain Network предупредуваат дека Националната гарда се злоупотребува за политички цели, а не за вистинска одбрана на заедниците. Тие истакнуваат дека гардата треба да биде на располагање во природни катастрофи и итни случаи, не во служба на политичка агенда.
Белата куќа најави дека слични акции би можеле да следат и во други демократски градови, како што е Лос Анџелес, каде што се чека судска одлука дали Трамп го прекршил законот со испраќањето на гардата без дозвола од гувернерот.
