Резултатите од истражувањето нарачано од агенцијата ДПА, откриваат дека една третина од граѓаните на Германија стравуваат дека напредокот на вештачката интелигенција (ВИ) може да предизвика губење на нивните работни позиции.
Испитувањето, спроведено од страна на институтот за истражување на јавното мислење YouGov, во кое учествуваа 2.175 лица, покажа дека 34% од анкетираните имаат загриженост за својот професионален статус поради ВИ, додека 62% не се чувствуваат изложени на ризик.
Иако не се констатирани значајни разлики меѓу приврзаниците на различните политички партии во државата, вработените кои живеат во урбани средини и оние со пониско ниво на образование покажуваат поголем страв дека ќе бидат заменети од вештачката интелигенција во иднина.
Според едно истражување објавено од Институтот Ифо во јуни, приближно 27% од компаниите во Германија предвидуваат дека вештачката интелигенција ќе резултира со намалување на работните места во текот на наредните пет години. Околу 5% од компаниите очекуваат зголемување на работните места како резултат на ВИ, додека две третини не очекуваат никаква промена.
Откако американската компанија OpenAI го лансираше својот прв голем јазичен модел, ChatGPT, во ноември 2022 година, развојот на моделите со вештачка интелигенција забележа огромен прогрес.
Бранот модели со вештачка интелигенција што оттогаш ги создадоа разни компании се подобри во однос на логиката, ефикасноста, скалабилноста и истовремената обработка на текст, слики, аудио, видео и други формати.
