Американскиот Сенат го отфрли обидот да се ограничи претседателот Доналд Трамп во водењето на воените операции против Иран, откако резолуцијата што бараше поголем надзор од Конгресот не доби доволна поддршка.
Таканаречената Резолуција за воени овластувања беше одбиена со 53 гласа против и 47 за, при што мнозинството републикански сенатори застанаа зад претседателот.
Со предлогот требаше да му се забрани на Трамп да продолжи со воените акции против Иран без претходно одобрување од Конгресот.
Сенатори гласаа спротивно од своите партии
Резолуцијата беше предложена од републиканскиот сенатор Ранд Пол и демократот Тим Кејн.
Во гласањето имаше и по едно „пребегнување“ од двете партии. Демократскиот сенатор Џон Фетерман ја поддржа војната со Иран и гласаше против резолуцијата, додека републиканецот Ранд Пол, познат како критичар на воени интервенции, ја поддржа.
Кејн пред гласањето изјави дека претседателот не доставил доволно докази дека САД се соочуваат со непосредна закана од Иран, што според него требало да биде основа за ваква воена акција.
Дебата за уставните овластувања
Според американскиот Устав, Конгресот има право да објави војна, но во пракса претседателите на САД од двете партии често започнувале воени операции без формална објава на војна.
Гласањето во Сенатот се сметаше за тест за политичката поддршка на Трамп, чии републиканци имаат тесно мнозинство во двата дома на Конгресот.
Слична резолуција се очекува да биде разгледана и во Претставничкиот дом, но по одлуката на Сенатот исходот се смета главно за симболичен.
Во меѓувреме, конфликтот продолжува да ескалира, откако САД и Израел од крајот на февруари изведуваат напади врз цели во Иран.
