Американскиот претседател Доналд Трамп изјави дека преговорите меѓу Соединети Американски Држави и Иран во Исламабад завршиле без договор за клучното прашање, иранската нуклеарна програма. Според Трамп, иако бил постигнат напредок во повеќето точки, најважното прашање останало нерешено.
„Се договоривме за многу работи, но не и за она што е најважно – нуклеарното прашање“, порача тој.
Тој повтори дека Вашингтон нема да дозволи Иран да развие нуклеарно оружје, обвинувајќи го Техеран дека не сака да се откаже од своите амбиции.
Најавена блокада на Ормускиот теснец
Трамп најави дека американската морнарица ќе започне процес на блокада на Ормуски теснец – една од најважните светски поморски рути низ која поминува над 20% од глобалната трговија со нафта.
Според најавата, мерките ќе вклучуваат пресретнување на бродови што влегуваат или излегуваат од теснецот, контрола на пловила што плаќале такси на Иран и отстранување на морски мини.
„Ова е глобална уцена и нема да ја дозволиме“, изјави Трамп.
Тој предупреди дека секој напад врз американски или цивилни бродови ќе биде силно возвратен, додавајќи дека и други држави може да се приклучат на блокадата.
Преговори од над 20 часа без резултат
Преговорите меѓу двете страни траеле повеќе од 20 часа и претставуваат едни од најинтензивните директни разговори меѓу двете земји во последните децении. Американската делегација ја предводел потпретседателот Џеј Ди Венс, кој претходно соопшти дека разговорите не успеале и покрај сериозните напори.
Главните точки на несогласување биле иранската нуклеарна програма, контролата врз Ормускиот теснец и санкциите и безбедносните гаранции.
Расте ризикот од нова ескалација
Иако во моментот е на сила кревко примирје, најавата за блокада укажува на можност за нова ескалација на тензиите.
Ситуацијата на Блискиот Исток останува нестабилна, а развојот на настаните може да има сериозни последици врз глобалната економија и енергетската безбедност
