Американскиот претседател Доналд Трамп најави брз и силен одговор по нападот со дронови врз американската амбасада во Ријад, при што избувнал помал пожар и била предизвикана ограничена материјална штета. Според извори на Ројтерс, нема повредени лица бидејќи зградата во моментот била празна.
Нападот се случува во услови на засилени ирански ракетни и напади со беспилотни летала врз земјите од Персискиот Залив каде што има американски воени бази, по саботните американски и израелски напади врз Иран.
Ирански претставници објавија дека уништиле американска база во Бахреин, додека еден висок функционер се закани дека Техеран може да ги запали бродовите во Ормутскиот Теснец – клучна поморска рута за глобалната трговија со нафта.
Американскиот државен секретар Марко Рубио изјави дека „најтешките удари допрва доаѓаат“, но одби да открие детали за тактичките потези на САД.
Трамп порача дека војната била „последна шанса“ за запирање на иранскиот режим. Во саботата, САД и Израел извршија координирани напади врз цели во Иран, при што беше убиен ајатолахот Али Хамнеи. Израел потоа продолжи со нови напади врз Техеран и врз позиции на Хезболах во Либан, нагласувајќи дека операциите нема да запрат додека заканата не биде целосно отстранета.
Поради ескалацијата, стотици луѓе во Бејрут беа евакуирани во засолништа, додека регионот влегува во нова фаза на неизвесност и зголемена безбедносна тензија.
