Американскиот претседател Доналд Трамп во деветминутно телефонско интервју за CNN изјави дека американската војска „го разорува“ Иран, но предупреди дека „големиот бран“ во војната допрва следува.
„Го разоривме. Мислам дека ни оди многу добро. Тоа е многу моќно. Ја имаме најголемата војска во светот и ја користиме“, му изјави Трамп на новинарот Џејк Тапер.
Запрашан колку долго би можел да трае конфликтот, Трамп рече дека не сака војната да се одолговлекува.
„Не сакам да видам дека трае предолго. Секогаш замислував дека ќе трае четири недели. И ние сме малку пред рокот“, изјави тој.
На прашањето дали Соединетите Американски Држави прават повеќе од воени напади со цел да му помогнат на иранскиот народ да ја преземе контролата врз својата земја од режимот, Трамп одговори потврдно.
„Да, навистина правиме. Но сега сакаме сите да останат внатре. Таму не е безбедно“, рече Трамп, додавајќи дека ситуацијата наскоро ќе стане „уште помалку безбедна“.
Американскиот претседател истакна дека, според него, најсилниот дел од операциите допрва следува.
„Сè уште не сме ни почнале силно да ги удираме. Големиот бран сè уште не се случил. Големиот бран доаѓа наскоро“, нагласи Трамп во интервјуто за CNN.
Изјавите на Трамп доаѓаат во услови на засилени воени дејствија меѓу САД, Израел и Иран, при што засега нема официјална временска рамка за завршување на конфликтот.
