Веста ја потврди неговиот адвокат Ренато Стабиле, истакнувајќи дека Ернандес веќе е пуштен на слобода, пренесува CNN.
Трамп минатата недела најави дека има намера целосно да го помилува Ернандес, што значи бришење на пресудата што го испрати поранешниот средноамерикански лидер во затвор. Податоците од американската Управа за затвори потврдуваат дека тој е отпуштен од установата во Западна Вирџинија.
Адвокатот Стабиле изјави дека семејството е благодарно за, како што ја нарече, исправена неправда. Сопругата на Ернандес, Ана Гарсија де Ернандес, објави на социјалните мрежи дека нејзиниот сопруг „повторно е слободен човек“ благодарение на помилувањето. Белата куќа застана во одбрана на одлуката, и покрај критиките дека помилувањето на осуден трговец со дрога ја поткопува борбата против карибските нарко картели. Портпаролката Каролајн Левит оцени дека случајот бил „претерана обвинение на Бајденовата администрација“ против политички противник.
Ернандес, кој беше претседател од 2014 до 2022 година, лани беше осуден на 45 години затвор и осум милиони долари казна. Американските обвинители го товарија дека соработувал со нарко картели за транспорт на повеќе од 400 тони кокаин кон САД, примајќи милиони долари мито за сопствен политички подем.
Иако Трампова администрација ја префрла вината кон претходното раководство, медиумите потсетуваат дека братот на Ернандес беше процесуиран токму во време на првиот мандат на Трамп, од обвинител кој подоцна стана дел од неговиот правен тим и федерален судија именуван од самиот Трамп.
Според извештаите, за помилувањето лобирале неколку личности блиски до Трамп, меѓу кои и неговиот долгогодишен сојузник Роџер Стоун, кој уште во јуни го повикал Трамп да го ослободи Ернандес, тврдејќи дека истиот бил „цел“ на Бајденовата администрација.
Извор: Index.hr
