Грчкиот остров Крф беше погоден од торнадо кое предизвика значителна материјална штета, уривање на еден киоск и оштетувања на покривите на куќи и деловни објекти, јавува грчкиот јавен сервис ERT. Силните ветрови носеле кровни ќерамиди, додека невремето довело и до пад на дрвја и прекин на електричната енергија.
Екипи на противпожарната служба и Цивилната заштита од општината Северен Крф веднаш интервенирале на терен, отстранувајќи предмети разнесени од ветерот и расчистувајќи ја патната мрежа од скршени гранки.
Во местото Кавададес, дрво паднало врз електрични кабли, поради што без струја останал поголем дел од северозападниот дел на островот. Сличен инцидент бил регистриран и во Периволи, каде што поради силниот ветер дрво ја оштетило електричната мрежа, предизвикувајќи двочасовен прекин во снабдувањето со електрична енергија.
Поради излевање на морето на коловозот, сообраќајот на крајбрежниот пат бил во прекин неколку часа, бидејќи условите не дозволувале безбедно разминување на возилата.
Лет на авиокомпанијата Aegean Airlines кон аеродромот Јоанис Каподистријас бил принуден да користи алтернативна рута за да ги избегне олујните облаци над западниот дел на островот, по што слетал со задоцнување.
Надлежните служби продолжуваат со проценка на штетите, додека жителите се повикани на внимателност поради можност од нови временски нестабилности.
