Новоизбраниот претседател Доналд Трамп рече дека „најверојатно“ ќе ја одложи забраната за TikTok за 90 дена откако ќе ја преземе функцијата во понеделник, но истакна дека не донел конечна одлука во телефонското интервју за NBC News во саботата.
Трамп рече дека би било „соодветно“ да се одобри продолжување на видео-платформата која беше забранета со двопартиски закон усвоен минатата година и потврден од Врховниот суд оваа недела.
„Мислам дека тоа би било, секако, опција што ја разгледуваме. Продолжувањето од 90 дена е нешто што најверојатно ќе се направи, бидејќи е соодветно. Знаете, тоа е соодветно. Мора да го погледнеме внимателно. Тоа е многу голема ситуација“, рече Трамп во интервјуто.
„Ако одлучам да го направам тоа, веројатно ќе го објавам во понеделник“, додаде тој.
Од TikTok најавија дека ќе ја исклучат платформата во недела. Законот усвоен минатата година му дозволува на претседателот да го одложи стапувањето на сила на забраната за 90 дена, но бара докази дека кинеската компанија работи на договор за продажба на TikTok на компанија во американска сопственост и дека е постигнат значителен напредок.
Извршниот директор на TikTok, Шоу Чу се состана со Трамп во неговиот дом во Мар-а-Лаго во неделите пред стапувањето на сила на забраната и се очекува да присуствува на инаугурацијата на Трамп во понеделник.
