Популарните социјални мрежи продолжуваат да им прикажуваат на тинејџерите содржини поврзани со самоубиство, самоповредување и „интензивна депресија“, откри нов извештај на британската фондација Molly Rose Foundation.
Според истражувањето, TikTok и Instagram препорачуваат „шокантно ниво на штетна содржина“ на тинејџерите.
Во тестовите, организацијата креирала лажни профили кои се претставувале како 15-годишни девојчиња што претходно имале интеракција со ваква проблематична содржина. Речиси сите видеа што им биле препорачани се однесувале на самоубиство, депресија или самоповредување.
Алгоритми што ги туркаат младите во опасност
На пример, TikTok редовно прикажувал видеа кои „експлицитно го промовирале и глорифицирале самоубиството“, вклучително и препораки за конкретни методи, стои во извештајот.
На Instagram, овие содржини најчесто се појавувале преку функцијата Reels (кратки видеа).
„Штетните алгоритми продолжуваат да ги бомбардираат тинејџерите со огромни количини опасна содржина – и тоа на индустриско ниво, преку платформите што најмногу ги користат младите,“ изјави Енди Бароус, извршен директор на фондацијата.
Истражувањето е спроведено пред да стапат во сила новите правила за безбедност на деца од Британскиот закон за онлајн безбедност, крајот на јули. Законот обврзува платформите да ја отстранат илегалната содржина поврзана со самоубиство и самоповредување, и проактивно ги заштитат корисниците од такви содржини.
Сепак, фондацијата вели дека наодите покажуваат дека малку е променето од 2017 година, кога 14-годишната Моли Расел изврши самоубиство. Судијата утврди дека штетната содржина на интернет придонела за нејзината смрт „во повеќе од минимална мера“.
Фондацијата ја повика британската регулаторна агенција Ofcom да преземе дополнителни чекори за заштита на младите, како и владата да го зајакне Законот за онлајн безбедност.
Одговори од TikTok и Meta
TikTok одговори дека наодите „не ја рефлектираат реалната слика за искуството на корисниците“, додавајќи дека извештајот и самиот го признава тоа. Портпарол изјави дека TikTok проактивно отстранува 99% од содржината што ги крши правилата.
Meta, сопственикот на Instagram и Facebook, исто така го оспори извештајот, велејќи дека методологијата е „ограничена“. Од таму истакнаа дека „десетици илјади“ тинејџери се дел од нивниот нов систем на Teen Accounts, профили со вградени безбедносни опции и ограничувања на пристап до чувствителна содржина.
„Teen Accounts се создадени за да ги заштитат тинејџерите, и постојано работиме на тоа,“ изјави портпарол од Meta.
Извор: Euronews Next
