Помалку од 48 часа пред почетокот на американско-израелскиот напад врз Иран, израелскиот премиер Бенјамин Нетанјаху телефонски разговарал со американскиот претседател Доналд Трамп, убедувајќи го дека се работи за историска можност за акција, објави Ројтерс.
Според извори запознаени со разговорот, двајцата лидери имале разузнавачки информации дека врховниот лидер на Иран, Али Хамнеи, ќе присуствува на состанок во Техеран заедно со најблиските соработници, што го правело потенцијална цел.
Нетанјаху инсистирал дека таква шанса можеби никогаш повеќе нема да се појави и дека елиминацијата на Хамнеи би можела да го смени текот на историјата. Во аргументите го вклучил и наводниот обид за атентат врз Трамп во 2024 година, како и убиството на иранскиот генерал Касем Сулејмани.
Иако Трамп веќе размислувал за воена операција, конечната одлука сè уште не била донесена. Според три извори, токму овој разговор бил „завршниот поттик“ за наредбата за напад, познат како операцијата „Епски бес“, започната на 27 февруари.
Од Белата куќа не дадоа директен коментар за разговорот, но истакнаа дека целта на операцијата била уништување на иранските воени капацитети и спречување на развој на нуклеарно оружје.
Нетанјаху, пак, јавно ги отфрли тврдењата дека Израел го вовлекол САД во конфликтот, нагласувајќи дека одлуката била исклучиво на Трамп.
Нападите доведоа до сериозни последици, илјадници жртви во Иран, удари врз американски цели и сојузници во регионот, како и нагло зголемување на цените на нафтата. Затворањето на клучни поморски рути дополнително ја продлабочи глобалната економска неизвесност.
Иако постоеле очекувања дека елиминацијата на Хамнеи може да доведе до промена на режимот, ЦИА предупредила дека најверојатно ќе дојде до поставување на уште потврд лидер. Навистина, нов врховен лидер станал неговиот син, Моџтаба Хамнеи, кој се смета за уште поцврст противник на Западот.
Со војната која влегува во четвртата недела, регионот останува длабоко нестабилен, а перспективите за дипломатско решение сè уште се неизвесни.
