Тајванските власти започнаа со проширување на одбраната на клучни инфраструктурни и енергетски објекти на островот, вклучително и засилени мерки против беспилотни летала и зголемено домашно производство на муниција, во обид да се одговорат на сè посилниот воен притисок од Кина и на новите сомнежи околу долгорочната посветеност на Соединетите Американски Држави кон одбраната на островот.
Вицепремиерката на Тајван, Ченг Ли-чун, изјави дека земјата мора да биде „целосно подготвена“, особено во услови кога се соочува со ризици од таканаречени „сиви зони на конфликт“, кои вклучуваат упади со дронови, сајбер-операции и ограничени воени притисоци без формално започнување конфликт. Таа нагласи дека овие мерки се директен одговор на континуираниот притисок од Пекинг, но и на променливите сигнали што доаѓаат од Вашингтон.
Загриженоста во Тајпеј дополнително се зголеми по изјавите на американскиот претседател Доналд Трамп во интервју за „Њујорк тајмс“, во кое тој направи споредби меѓу Тајван и неодамнешните американски воени дејствија во Венецуела. На прашањето дали Кина го гледа Тајван како „сепаратистичка закана“, Трамп одговори дека тоа е „на одлука на кинескиот претседател“, додавајќи дека би бил „многу незадоволен“ доколку Пекинг преземе конкретни чекори против островот.
Иако Трамп изрази уверување дека кинескиот лидер Си Џинпинг нема да нападне или блокира Тајван за време на неговиот претседателски мандат, ваквите изјави во Тајван се толкуваат како недоволно јасна безбедносна гаранција, особено во контекст на зголемената кинеска воена активност во регионот.
Кина го смета Тајван за дел од својата територија и не ја исклучува употребата на сила за „обединување“, додека поголемиот дел од меѓународната заедница, вклучително и САД, формално не го признава Тајван како независна држава, но се спротивставува на секое насилно менување на статус-квото. Вашингтон, во таа рамка, со години го снабдува Тајван со оружје и воена опрема.
Од стапувањето на должност на актуелниот тајвански претседател Вилијам Лаи Чинг-те во 2024 година, Пекинг значително го интензивира воениот притисок врз островот, редовно спроведувајќи воени вежби во неговата близина. За време на минатогодишните вежби за симулирана блокада на Тајван, кинеската Народноослободителна војска изведе и пробни напади врз клучни енергетски постројки, што дополнително ја засили загриженоста за можни идни сценарија на ескалација.
