Австралиските власти соопштија дека еден напаѓач е убиен, додека вториот се наоѓа во критична состојба. Вкупно 29 лица се згрижени во болници поради повреди. Вознемирувачки видеоснимки прикажуваат двајца вооружени мажи со автоматски пушки како пукаат неселективно кон толпата, предизвикувајќи паника и хаос.
Австралискиот премиер Ентони Албаниз изјави дека станува збор за „целен напад врз еврејските Австралијци“, опишувајќи го како „зло антисемитско терористичко дело“ и напад „врз нашиот начин на живот“. Тој порача дека ваквата омраза нема место во австралиското општество и дека ќе биде искоренета.
„Нема место за омраза, насилство и тероризам во нашата земја. Ќе го искорениме тоа. Во овој мрачен момент, Австралија ќе покаже национално единство и солидарност со нашите сограѓани од еврејска вероисповед“, изјави Албаниз.
Силни реакции стигнаа и од Европа. Германскиот канцелар Фридрих Мерц изјави дека нападот го оставил „без зборови“ и повика на глобална акција против ширењето на антисемитското насилство. Францускиот претседател Емануел Макрон изрази сочувство и порача дека Франција ќе продолжи со „неуморната борба против антисемитската омраза, каде и да се појави“.
Британскиот премиер Кир Стармер го оцени нападот како „длабоко вознемирувачки“, нагласувајќи дека заедничка обврска е спротивставувањето на антисемитизмот. Италијанската премиерка Џорџа Мелони повика на решителност во борбата против секоја форма на насилство и антисемитизам, додека претседателката на Европската комисија, Урсула фон дер Лајен, порача дека Европската Унија е обединета против омразата и насилството.
Израелскиот министер за надворешни работи Гидеон Саар оцени дека нападот е резултат на, како што рече, „антисемитското дивеење на улиците на Австралија во изминатите две години“.
Нападот се случил за време на прославата на Ханука, еден од најважните еврејски празници, на која присуствувале околу 1.000 луѓе. Полицијата во Нов Јужен Велс издаде итно предупредување до граѓаните да се засолнат или да ја избегнуваат областа, додека очевидци сведочеа за сцени на паника и бегство.
Австралиската еврејска асоцијација упати апел до јавноста со повик за молитва и поддршка за еврејската заедница во земјата, додека истрагата за нападот продолжува.
Извор: Euronews
