На Волстрит, индексот Dow Jones порасна за 1,1% и достигна 46.758 поени, S&P 500 се зголеми за 1,1% на 6.715 поени, а Nasdaq за 1,3% на 22.780 поени. Овој раст, според аналитичарите, најмногу се должи на очекувањата дека Федералните резерви ќе продолжат со политиката на пониски камати.
Последните економски податоци покажуваат дека американскиот пазар на труд слабее, што беше и главната причина за неодамнешното намалување на каматната стапка за 0,25 процентни поени. Инвеститорите очекуваат дека до крајот на годината ФЕД ќе изврши уште две дополнителни намалувања – во октомври и декември.
Иако некои претставници на Федералните резерви ја поддржуваат оваа стратегија, други предупредуваат дека не треба да се брза, бидејќи инфлацијата сè уште е над целните 2%.
Минатата недела тргувањето беше нешто повнимателно поради привременото затворање на сојузните служби во САД, откако Републиканците и Демократите не успеаја да постигнат договор за финансирање. Иако ваквите прекини се редовна појава и ретко имаат поголемо влијание врз пазарите, аналитичарите предупредуваат дека овој пат политичкиот застој може да потрае.
На европските берзи, исто така, беше забележан раст: лондонскиот FTSE индекс порасна за 2,2% на 9.491 поен, франкфуртскиот DAX за 2,65% на 24.378 поени, а парискиот CAC за 2,7% на 8.081 поен. Благодарение на овие резултати, STOXX 600 индексот на водечките европски компании достигна ново рекордно ниво.
Извор: Index.hr
