Целта на одбележувањето на овој датум е да се помогне и да се зголеми разбирањето за луѓето со аутизам, давајќи им поддршка ширум светот.
Годинава акцентот е ставен на давање целосна поддршка на лицата со аутизам да го постигнат својот максимален потенцијал во согласност со нивната здравствена состојба.
Аутизмот или нарушувањето на спектарот на аутизмот се однесува на широк опсег на состојби кои се карактеризираат со нарушувања во социјалните вештини и комуникација, повторувачко однесување, промени во говорот и невербална комуникација.
Начините на кои луѓето со аутизам учат, размислуваат и решаваат проблеми може да варираат од високо квалификувани до тешки предизвици. Некои луѓе со аутизам може да имаат потреба од значителна поддршка во секојдневниот живот, на некои помалку поддршка, додека во некои случаи, тие живеат целосно независно.
Знаците на аутизам обично се појавуваат во втората или третата година од животот. Некои поврзани доцнења во развојот може да се појават порано и често може да се дијагностицираат уште на 18 месеци.
Истражувањата покажуваат дека раната интервенција води до позитивни резултати подоцна во животот за луѓето со аутизам.
Факторите на ризик за развој на аутизам се следните:
Генетски фактори на ризик за аутизам
Истражувањата ни кажуваат дека аутизмот има тенденција да се јавува кај членовите на исто семејство. Промените во одредени гени го зголемуваат ризикот детето да развие аутизам.
Ако родителот носи една или повеќе од овие генски промени, тие може да се пренесат на детето (дури и ако родителот нема аутизам).
Фактори на ризик од животната средина
Истражувањата, исто така, покажуваат дека одредени влијанија од околината можат дополнително да го зголемат – или да го намалат – ризикот од аутизам кај луѓето кои се генетски предиспонирани за ова нарушување.
Зголемен ризик од развој на аутизам
Зголемениот ризик за развој на аутизам вклучува: постара возраст на родителите (било кој од родителите), компликации за време на бременост и породување (на пример, екстремно предвремено родени бебиња пред 26 недели, мала тежина на раѓање, повеќекратна бременост – близнаци, тројки, бременост со редуцирана киселост, бременост со разлика од помалку од една година од претходна бременост).
Намален ризик од развој на аутизам
Употребата на витамини кои содржат фолна киселина во пренаталниот период пред и за време на зачнувањето како и за време на бременоста има влијание врз намалувањето на ризикот од развој на аутистични нарушувања.
Јадењето здрава храна, избегнувањето инфекции и редовните контроли кај избраниот гинеколог може да ги зголеми шансите за здраво дете.
Вакцините како фактор на ризик?
Секое семејство има уникатно искуство со дијагноза на аутизам, а за некои тоа се совпаѓа со времето на вакцинирање на нивното дете. Во исто време, научниците спроведоа опсежни истражувања во текот на изминатите две децении за да утврдат дали постои некаква врска помеѓу вакцините во детството и аутизмот.
Резултатите од ова истражување се јасни: вакцините не предизвикуваат аутизам. Американската академија за педијатрија спровела опсежно истражување на оваа тема, пишува autismspeaks.org.
Секое дете или возрасен со аутизам има уникатни силни страни и предизвици, така што не постои единствен пристап за лекување и интервенција за аутизмот.
Многу луѓе со аутизам имаат дополнителни медицински состојби како што се нарушувања на спиењето, напади и гастроинтестинални нарушувања.
Решавањето на овие состојби може да го подобри вниманието, учењето и поврзаните однесувања. Секоја интервенција за аутизам или план за третман треба да биде прилагодена на специфичните потреби на поединецот. Планот за лекување на една личност може да вклучува интервенции во однесувањето, лекови, други терапии или комбинација од сите.
Додека не се дијагностицира аутизмот и не започне лекувањето, родителите можат да помогнат со следење на социјалниот и емоционалниот развој на детето, а доколку нешто не изгледа како што треба, не треба да чекаат да поработат на развојот и однос со детето.
