Студентите од Нови Сад, кои се во блокада, денеска организираа голем протест на Плоштадот на слободата, кој започна во 18 часот. Собирот се одржува под мотото „Што значи победа?“, а на него студентите ги претставуваат своите идеи за ослободување на институциите и најавуваат идни активности.
Покрај студентите, на собирот им се обраќаат и експерти од различни области, додека граѓаните имаат можност да потпишат поддршка за студентските барања. Новосадската полиција претходно најави дека ќе го снима денешниот студентски протест.
Според проценките, неколку илјади граѓани се собраа на Плоштадот на слободата. На присутните им се обрати и Јелена Клеут, професорка на Филозофскиот факултет, која Сенатот на Универзитетот во Нови Сад одби да ја избере во звање редовен професор. Таа одлука беше оценета како чин на политички реваншизам поради нејзината поддршка на студентските протести.
„Утре, 18 јануари, се навршува годишнина од првото големо собирање на професорите од Слободниот универзитет – академска заедница која застана зад своите студенти. Тогаш 4.000 од нас реагиравме. Излеговме гневни – поради насилството врз студентите, притисоците, таргетирањето во таблоидите и заплашувањата од безбедносните служби“, изјави Клеут.
Собраните граѓани скандираа „Јелена, Јелена“ и „пумпај, пумпај“.
Претходно во текот на денот беа забележани и засилени полициски сили, кои влегоа во Градската куќа, додека неколку полициски возила беа распоредени зад зградата на Градското собрание.
Една од студентките порача дека победата не е конечна цел, туку процес кој мора заеднички да се спроведе за да се изгради праведно општество засновано на одговорност, а не на корупција.
„Овој режим не ја познава одговорноста. Тоа се покажа и со одлуката професорката Јелена Клеут да не биде избрана во звање, иако ги исполнуваше сите услови. По 20 години работа, беше казнета затоа што ги поддржа своите студенти. Време е ние да застанеме зад неа“, порача студентката.
