Доколку тоа не се случи, велат дека ќе следи радикализација на протестите – но, како и досега, на мирен начин.
Во изјава за Радио Слободна Европа, Александар Милошевиќ, студент од Математичкиот факултет во Белград и учесник во блокадата, рече дека на студентската изборна листа ќе се најдат лица кои, пред сè, ќе бидат подготвени да ги исполнат барањата на студентите.
Кандидатите, кои ги предлагаат сите факултети, не смеат да бидат членови на владејачките партии, а сè уште се дискутира за можноста некој од опозицијата да учествува.
„Ова ќе биде листа составена од стручњаци, работници и луѓе кои досега немале блиски врски со политиката, но во кои имаме доверба – не само да ги исполнат барањата, туку и да се усогласат со вредностите што граѓаните на Србија ги сметаат за здрав разум“, изјави Милошевиќ.
Тој објасни дека секој факултет предлага по два кандидати (еден маж и една жена), како и две резерви, и дека се гарантира застапеност на сите факултети кои се во блокада во Србија во првите 125 места на листата.
Милошевиќ додаде дека идната влада, која би се формирала по вонредните избори, би имала ограничен мандат – со цел да создаде услови за нови избори.
