Самостојниот синдикат на новинари и медиумски работници (ССНМ) најави дека ќе се приклучи на работничкиот протест закажан за 28 јануари 2026 година, со јасно барање за итно зголемување на минималната плата, како и корективно покачување на платите во медиумскиот сектор.
Одлуката била донесена на состанок на Извршниот одбор на ССНМ, при што синдикатот ги повика своите членови да дадат целосна поддршка на барањата за подобрување на економската положба на работниците. Протестот, на кој повикува Сојузот на синдикати, е закажан за среда во 17 часот, а од ССНМ оценуваат дека станува збор за достоинствен и легитимен израз на работничкото незадоволство.
Според податоците од анкетата спроведена од ССНМ и Институтот РЕСИС во 2024 година, повеќе од половина од вработените во медиумите земаат плата под државниот просек, додека речиси една третина од новинарите, камермани, монтажери, дизајнери и други медиумски работници се платени со минимална плата. Овие бројки, според синдикатот, укажуваат на длабок структурен проблем во медиумската индустрија.
ССНМ предупредува дека континуираниот пад на приходите и влошените услови за работа во медиумите не се само професионален проблем, туку имаат директно влијание врз квалитетот на информирањето и демократските процеси во земјата. Синдикатот смета дека законски предвиденото зголемување на минималната плата е недоволно и дека без посериозна корекција, голем дел од медиумските работници ќе продолжат да ја чувствуваат тежината на инфлацискиот притисок.
Како најголема еснафска организација во медиумскиот сектор, ССНМ потсетува дека уште пред шест месеци јавно го изнесе својот став за неопходноста од зголемување на минималната плата, целосно усогласен со барањата на поголемите синдикати во земјата. Со приклучувањето на протестот, синдикатот уште еднаш нагласува дека економската сигурност на новинарите е предуслов за професионално, навремено и одговорно информирање на граѓаните.
