Археолошкиот локалитет Виминациум кај Костолац, еден од најзначајните остатоци од римскиот период во Србија, наскоро ќе добие свое место во популарната видеоигра Minecraft. Покрај Виминациум, виртуелни верзии ќе добијат и античкото пристаниште Остија Антика во Италија, Casa Árabe во Шпанија и римската вила во словенечка Изола – сите дел од проектот „Зелено наследство“ на програмата Креативна Европа.
Според Јелена Анџелковиќ-Грашар, виша научна соработничка на Археолошкиот институт, идејата е преку видеоиграта да се доближи културното наследство до генерацијата Алфа – децата родени по 2011 година, кои комуницираат преку платформи како Discord, а не преку традиционалните социјални мрежи.
„Мајнкрафт е одличен избор затоа што не содржи насилство, туку нуди образовна вредност и ја промовира одржливоста на природата. Наша цел е да ги пренесеме културните споменици во виртуелниот свет на играта и така да ја едуцираме младата генерација,“ вели Анџелковиќ-Грашар.
Проектот е реализиран во соработка со италијанскиот студио Makers Camp, кој ќе помогне во техничката изработка. Но, креативниот дел ќе биде препуштен на младите – тие ќе учествуваат во работилници и изработка на пилот-прототипови, со цел Minecraft верзијата на овие локалитети да биде автентична и привлечна за нивните врсници.
Анџелковиќ-Грашар додава дека Археолошкиот институт веќе 20 години управува со Виминациум, но класичните туристички посети не се доволно привлечни за денешните деца.
„Младите денес бараат кратки, јасни и визуелно интересни информации. Ако не си ефективен во комуникацијата, губиш контакт со нив,“ додава таа.
Во фокусот на проектот „Зелено наследство“ е и влијанието на климатските промени врз културното наследство. Се истражуваат методи за конзервација и интеграција со природното опкружување, бидејќи археолошките паркови не можат да опстанат изолирано од природата која ги опкружува.
