Постапките поврзани со трагедијата во дискотеката „Пулс“ во Кочани се соочуваат со нов застој, откако обвинителката Ивана Алексова Трајчева повеќе нема да ги води предметите против полициските службеници.
Одлуката на Советот на јавни обвинители да не ѝ го продолжи мандатот во Обвинителството за гонење организиран криминал и корупција значи дека случаите ќе бидат преземени од друг обвинител.
Станува збор за три предмети кои веќе беа во напредна фаза, при што дел од нив требаше да влезат во судска постапка. Со промената, новиот обвинител ќе треба дополнително да се запознае со обемната документација, што може да влијае врз времетраењето на процесите.
Од Советот на јавни обвинители соопштија дека одлуката е донесена со цел да се овозможи ротација на кадри и да се избегне концентрација на моќ во институцијата.
Државниот јавен обвинител Ненад Савески истакна дека во вакви случаи предметите редовно ги презема друг обвинител и дека постапките продолжуваат согласно законските процедури.
Иако дел од судењата веќе беа најавени, одредени рочишта се одложени поради промените во обвинителскиот тим. Досега е започната постапка за еден предмет, додека останатите се во фаза на одложување.
Случајот „Пулс“, поврзан со пожарот во кој загинаа 63 лица, останува еден од најчувствителните во јавноста, а актуелните промени отвораат дилеми за ефикасноста и динамиката на судските процеси.
