Десеттиот состав на словенечкиот парламент денеска ја почна својата конститутивна седница во Љубљана, во атмосфера во која уште од стартот е јасно дека новиот мандат ќе почне со сериозни политички и меѓународни предизвици. На отворањето се обрати досегашната претседателка на парламентот Уршка Клакочар Жупанчич, која порача дека новоизбраните пратеници нема да имаат многу време за адаптација и учење.
Според конечните резултати од изборите одржани на 22 март, движењето „Слобода“ освои 29 пратенички места во парламентот со 90 членови, додека Словенечката демократска партија освои 28. Коалицијата составена од Нова Словенија, Словенечката народна партија и Фокус доби девет мандати, Социјалдемократите и Демократите по шест, а коалицијата Левица и Весна и партијата Ресница освоија по пет. Излезноста на изборите изнесувала 70,25 проценти.
Во текот на денот се очекува парламентот да избере и нов претседател, но разговорите за обезбедување мнозинство продолжувале и непосредно пред почетокот на седницата. Лидерот на „Слобода“, Роберт Голоб, изразил оптимизам дека гласањето ќе заврши успешно до крајот на денот.
Во меѓувреме, Словенечката демократска партија соопшти дека нема да предложи свој кандидат за претседател на парламентот, додека „Ресница“ најави сопствен предлог. Дополнителна политичка тензија отвора и најавата на Јанез Јанша дека неговата партија размислува за жалба до Уставниот суд во врска со Изборниот закон, со тврдење дека имало неправилности во изборниот процес. СДС веќе поднела неколку приговори до Државната изборна комисија, особено за гласањето во странство, но тие биле отфрлени.
Словенија така влегува во нов парламентарен мандат со тесен распоред на силите, неизвесно парламентарно мнозинство и најава дека уште на стартот ќе мора да се справува и со внатрешни политички спорови и со пошироки меѓународни притисоци.
