Симона Јованоска ќе го промовира романот „Леска Брезоска“ во издание на „Или-Или“

Симона Јованоска утревечер во Галерија-МКЦ ќе го промовира нејзиниот нов роман „Леска Брезоска“ во издание на „Или-Или“.

Промоцијата ќе се одржи од 19 часот во Галерија-МКЦ и ќе се одвива низ разговор на уредникот Ненад Стевовиќ со авторката.

„Леска Брезоска“ е втор роман на Симона Јованоска по дебитантскиот „Денот на црвот“ со кој ја освои престижната награда „Роман на годината “ за 2021 година.

Приказната во „Леска Брезоска“ се одвива во Гостивар и во Скопје и ја следи животната патека на  главната хероина од нејзиното детство, првите игри, детските трауми, другарувања, откривањето на сексуалноста, соочувањето со етничките тензии и немири па се до влегувањето во светот на возрасните и судирот со комплексните животни околности и борбата за нивното надминување. Романот е составен од меѓусебно испреплетени животни приказни сочинувајќи една кохерентна и заокружена целина а милјето во коешто се одвиваат е македонската општествена реалност од последниве децении.

Симона Јованоска е родена во 1985 година, во Гостивар. Во родниот град завршила средно економско училиште, а потоа Економски факултет во Скопје, отсек маркетинг. Во 2015 година ја објавува дебитантската книга раскази „Ги најдов во длабокото“ во издание на „Или-Или“.

Во 2019 година ја добива втората награда на конкурсот на дневниот весник „Нова Македонија“ за расказот „Последниот кат“ а во 2022 година е првонаградена за расказот „Кажи му на кучето“. Дебитантскиот роман „Денот на црвот“ (Или-Или, 2021, 2022, 2024) е прогласен за „Роман на годината“  за 2021 година од Фондацијата „Славко Јаневски“ и е преведен на бугарски, српски и хрватски јазик. Во 2022 во издание на „Чудна шума“ ја објавува книгата за деца „Градот Вабу и потрагата на Нави“.

е-Трн да боцка во твојот инбокс

Последни колумни