Сепак, оваа ознака често не значи тоа што потрошувачите мислат.
Што се всушност природни ароми?
Според правилниците на Европската унија, „природна арома“ значи дека вкусот или мирисот потекнуваат од природни извори – растенија, животни или микроорганизми. Тоа не значи дека во производот има вистинско овошје, зачини или билки, туку дека хемискиот состав што го создава вкусот е издвоен од природен извор.
На пример, „природна арома на јагода“ не мора да биде добиена од вистинска јагода. Таа може да се добие од ферментирана пченкарна глукоза, од квасец или дури и од дрво, сè додека финалниот молекуларен состав (на пример, етил-малтол) е идентичен со оној на природниот вкус на јагода. Со други зборови, вкусот може да е реален – но јагоди во производот можеби воопшто нема.
Каде е границата меѓу природно и вештачко?
„Вештачките ароми“ се создаваат во лабораторија од синтетички соединенија, додека „природните“ потекнуваат од биолошки извори. Но крајниот резултат е речиси ист: молекула што на нашите рецептори им дава впечаток на вкус на ванила, лимон или јагода.
Затоа, ознаката „со природни ароми“ не значи дека производот е поздрава или поквалитетна опција, туку само дека мирисот и вкусот потекнуваат од природен извор, а не од синтетички.
Вистината зад етикетата
Следниот пат кога ќе видите натпис „со природни ароми“, имајте предвид дека тоа не е гаранција дека јадете нешто природно. Често се работи за маркетинг-трик кој треба да создаде впечаток на природност.
Најпаметно е да ги проверите состојките на пакувањето – бидејќи токму таму, а не во рекламниот натпис, ќе ја најдете вистинската слика за тоа што навистина се наоѓа во вашиот производ.
Извор: Index.hr
