Во анализите на светските медиуми се наведува дека Пам Бонди не падна поради еден скандал, туку поради товарот на неколку проблеми што истовремено ѝ ја разнишаа позицијата: начинот на кој се справуваше со документите поврзани со Џефри Епстин, незадоволството на Доналд Трамп што не испорачала поагресивни случаи против неговите политички противници и пошироката нервоза во администрацијата, во момент кога Белата куќа влегува во нова турбулентна фаза. Трамп ја разреши на 2 април, а за привремен наследник го постави Тод Бланш.
Еден од најголемите удари врз Бонди беше случајот Епстин. Reuters објави дека таа се соочила со остри критики поради ракувањето со т.н. Epstein files, додека AP наведува дека прашањето предизвикало не само медиумски притисок, туку и двопартиска политичка непријатност. Тоа значеше дека проблемот одамна ја надминал дневната полемика и станал товар што директно ја поткопува нејзината позиција во врвот на администрацијата.
Но тоа не била единствената причина. Светските медиуми велат дека Бонди не успеала да ги претвори политичките очекувања на Трамп во одржливи обвиненија против неговите ривали. Дел од тие обиди заглавиле поради недостиг на докази, процедурални пречки, отпор од судови, пороти и внатрешни структури во Министерството за правда. Наместо демонстрација на сила, тоа почнало да изгледа како неуспешен обид за политичка пресметка.
Во позадина се насобрале и подлабоки институционални проблеми. Reuters наведува дека за време на мандатот Бонди била критикувана поради потезите со кои се урива традиционалната дистанца меѓу Белата куќа и Министерството за правда, вклучително и смени на кариерни обвинители и силно политизирање на работата на институцијата.
Нејзиното заминување доаѓа и во многу поширок контекст. Reuters денес објави дека Трамп размислува и за други кадровски промени под притисок од војната со Иран, падот на рејтингот и нервозата во републиканските редови.
