Цената на суровата нафта од типот Брент забележа раст од дури 64 проценти во текот на март, што претставува најголем месечен скок уште од Заливска војна 1990, јавува BBC.
Брент е глобален репер за цената на нафтата и се однесува на договори за купување барел нафта со испорака во иднина. Растот на оваа цена директно се прелева и врз цените на горивата, бидејќи нафтата е нивна основна суровина.
Во средата, цената на Брент за испорака во јуни достигна околу 105,36 долари (околу 97 евра), што е дополнителен раст од 1,2 проценти.
Паралели со 1990 година
Последен пат ваков драматичен скок бил забележан за време на ирачката инвазија врз Кувајт во 1990 година, кога глобалното снабдување со енергенси било сериозно нарушено и се појавил страв од поширок конфликт на Блискиот Исток.
Слични услови се присутни и денес, поради војната меѓу САД, Израел и Иран, која го зголемува геополитичкиот ризик и врши силен притисок врз цените на енергенсите.
Раст и на берзите
Паралелно со растот на цените на нафтата, азиските берзи забележаа значителен пораст, откако Доналд Трамп изјави дека САД би можеле да се повлечат од конфликтот со Иран во рок од две до три недели.
Јапонскиот индекс Nikkei 225 порасна за 4 проценти, додека јужнокорејскиот Kospi скокна за повеќе од 6 проценти.
Војната го тресе енергетскиот пазар
Конфликтот започна кон крајот на февруари, кога американските и израелските сили извршија напади врз ирански воени и нуклеарни цели, вклучително и бази на Иранска револуционерна гарда.
Иран возврати со напади со ракети и дронови врз американски бази и цели во регионот, додека судирите се проширија и на поморскиот сообраќај, особено во Ормуски теснец, низ кој поминува значителен дел од светската нафта.
Тензиите остануваат високи, а и покрај повремените сигнали за можни преговори, засега нема најава за брзо смирување на конфликтот.
