Лидерот на Северна Кореја, Ким Џонг Ун, најави дека земјата ќе продолжи со развој на ракети и во наредните пет години, објави државната новинска агенција KCNA.
Ким им наложил на надлежните институции да го зголемат производството на ракети и да изградат нови фабрики со цел да се задоволат воените потреби на земјата, нагласувајќи дека јакнењето на воените капацитети е клучен приоритет.
Според Reuters, севернокорејскиот лидер извршил увид во изградбата на нуклеарна подморница и го надгледувал тестирањето на ракета со долг дострел, која ја опишал како „стратегиска крстосувачка ракета“.
Во исто време, Ким го критикувал новиот договор меѓу САД и Јужна Кореја поврзан со нуклеарни подморници, оценувајќи го како „навредлив чин“ и сериозна закана за безбедноста на Пјонгјанг.
Најавите доаѓаат во период на засилени тензии на Корејскиот Полуостров и укажуваат на продолжување на милитаризацијата и ракетните програми на Северна Кореја.
